നിങ്ബോ (ചൈന): ഇന്ത്യയുടെ ബാഡ്മിന്റണ് സെന്സേഷനായ 20കാരന് ആയുഷ് ഷെട്ടിയുടെ അട്ടിമറിയാത്ര ഫൈനലില് വരെ എത്തിനില്ക്കുന്നു. 2026 ബാഡ്മിന്റണ് ഏഷ്യ ചാമ്പ്യന്ഷിപ്പിന്റെ പുരുഷ സിംഗിള്സ് സെമിയില് ലോക ഒന്നാം നമ്പറായ തായ്ലന്ഡിന്റെ കുന്ലാവുട്ട് വിറ്റിഡ്സറനെ വീഴ്ത്തിയ ആയുഷ് ഷെട്ടി ഫൈനലില് പ്രവേശിച്ചു.
ലോക 25-ാം നമ്പറുകാരനായ ആയുഷ്, മൂന്നു ഗെയിം നീണ്ട പോരാട്ടത്തിലൂടെയാണ് ഒന്നാം നമ്പറിനെ വീഴ്ത്തിയത്. ഒരു മണിക്കൂര് 15 മിനിറ്റ് നീണ്ട സെമിയില് 10-21, 21-19, 21-17ന് ആയുഷ് വെന്നിക്കൊടി പാറിച്ചു. ആദ്യ ഗെയിം നഷ്ടപ്പെട്ടശേഷമായിരുന്നു ഇന്ത്യന് താരത്തിന്റെ തിരിച്ചുവരവ് അട്ടിമറി.
ലോക നാലാം നമ്പറായ ഇന്തോനേഷ്യയുടെ ജോനാഥന് ക്രിസ്റ്റി (ക്വാര്ട്ടര്), ഏഴാം നമ്പറായ ചൈനയുടെ ലി ഷി ഫെങ് (ആദ്യറൗണ്ട്), 20-ാം റാങ്കുകാരനായ തായ് വാന്റെ ചി യു ജീന് (പ്രീക്വാര്ട്ടര്) എന്നിവരാണ് ആയുഷിന്റെ ഫൈനലിലേക്കുള്ള യാത്രയ്ക്കിടെ അടിതെറ്റി വീണത്.
കുന്ലാവുട്ടുമായുള്ള രണ്ടാം ഏറ്റുമുട്ടലായിരുന്നു ആയുഷിന്റേത്. കഴിഞ്ഞ വര്ഷം ആര്ട്ടിക് ഓപ്പണില് മുഖാമുഖം ഇറങ്ങിയപ്പോള് 15-21, 16-21ന് ആയുഷ് പരാജയപ്പെട്ടു. അതിന്റെ കണക്ക് തീര്ക്കുന്നതായിരുന്നു ഇന്നലത്തെ ജയം.
►ചരിത്രനേട്ടം◄
ബാഡ്മിന്റണ് ഏഷ്യ ചാമ്പ്യന്ഷിപ്പിന്റെ പുരുഷ-വനിതാ വിഭാഗം സിംഗിള്സില് ഫൈനലില് പ്രവേശിക്കുന്ന രണ്ടാമത് മാത്രം ഇന്ത്യന് താരമാണ് ആയുഷ് ഷെട്ടി. ഫൈനലില് പ്രവേശിച്ചതോടെ ചുരുങ്ങിയത് വെള്ളിമെഡലും ആയുഷ് ഉറപ്പിച്ചു.
ബാഡ്മിന്റണ് ഏഷ്യ ചാമ്പ്യന്ഷിപ്പിന്റെ പുരുഷ സിംഗിള്സില് ഇന്ത്യക്കായി മെഡല് നേടുന്ന ഏഴാമത് താരമാണ് ആയുഷ് ഷെട്ടി. സുരേഷ് ഗോയല് (വെങ്കലം 1965), ദിനേശ് ഖന്ന (സ്വര്ണം 1965, വെങ്കലം 1969), പ്രകാശ് പദുക്കോണ് (വെങ്കലം 1976), പുല്ലേല ഗോപിചന്ദ് (വെങ്കലം 2000), അനൂപ് ശ്രീധര് (വെങ്കലം 2007), എച്ച്.എസ്. പ്രണോയ് (വെങ്കലം 2018) എന്നിവരാണ് മുമ്പ് ഈ നേട്ടത്തിലെത്തിവര്.
►പദുക്കോണിന്റെ ശിഷ്യന്◄
ബിഡബ്ല്യുഎഫ് 2023 ലോക ജൂണിയര് ചാമ്പ്യന്ഷിപ്പില് വെങ്കലം നേടിയതോടെയാണ് കര്ണാടക സ്വദേശിയായ ആയുഷ് ഷെട്ടി ആദ്യം ശ്രദ്ധിക്കപ്പെട്ടത്.
ബംഗളൂരുവിലെ പ്രകാശ് പദുക്കോണ് ബാഡ്മിന്റണ് അക്കാദമിയിലാണ് (പിപിബിഎ) പരിശീലനം. റിഫ്ളക്സ്, മൂവ്മെന്റ് കാര്യങ്ങളില് അസാമാന്യ പ്രാഗത്ഭ്യമാണ് ആയുഷിനുള്ളത്. കഴിഞ്ഞ വര്ഷം യുഎസ് ഓപ്പണ് കിരീടം നേടി. 2025ല് ബിഡബ്ല്യുഎഫ് ലോക ടൂര് കിരീടം നേടിയ ഏക ഇന്ത്യന് താരമായിരുന്നു ആയുഷ്.
Deepika
E-paper LOGIN
LOGIN